வழக்கறிஞர் அதிசயகுமார் முதலாமாண்டு நினைவேந்தல்: சடங்குகளை மறுதலித்து புரட்சிகரமான முறையில் அனுசரிப்பு!

வழக்கறிஞர் அதிசயகுமார் முதலாமாண்டு நினைவேந்தல்: சடங்குகளை மறுதலித்து புரட்சிகரமான முறையில் அனுசரிப்பு!

தூத்துக்குடி:   பகுஜன் திராவிட கட்சி (Bahujan Dravida Party) சார்பில், மனித உரிமைப் போராளியும் வழக்கறிஞருமான அதிசயகுமார் அவர்களின் முதலாமாண்டு நினைவேந்தல் சிறப்புக் கூட்டமானது அனைத்து முக்கியத் தலைவர்கள், ஆளுமைகள் மற்றும் பொதுமக்களின் பங்கேற்புடன் தூத்துக்குடியில் எழுச்சியுடன் வெற்றிகரமாக நிறைவடைந்துள்ளது.

இவ்விழாவிற்கு பகுஜன் திராவிட கட்சியின் தேசியத் தலைவர் சர்தார் ஜீவன் சிங் அவர்கள் தலைமை தாங்கி வழிநடத்தினார். வழக்கமான சடங்குகளையும் சாஸ்திரங்களையும் முற்றிலுமாக மறுதலிக்கும் விதமாக இந்நிகழ்ச்சி மிகவும் புரட்சிகரமான முறையில் உணர்வுபூர்வமாக அனுசரிக்கப்பட்டது.

நிகழ்வுச் சுருக்கம்:

வரவேற்புரை:

நிகழ்வின் தொடக்கமாக, பகுஜன் திராவிட கட்சி தமிழ் மாநிலத் தலைவர் கொற்கை பழனி சிங் அவர்கள் வரவேற்புரை நிகழ்த்தி அனைவரையும் வரவேற்றார்.

 படம் திறப்பு நிகழ்வு (மலர்மாலைகளுக்குத் தடை):

வழக்கமான சடங்கு முறையான மாலை அணிவித்தல் முழுமையாகத் தவிர்க்கப்பட்டது. வழக்கறிஞர் அதிசயகுமாரின் திருவுருவப்படம் பேனாக்களாலும், வாள்களாலும் அலங்கரிக்கப்பட்டது. மனித உரிமைகள் கழகத்தின் துணைத் தலைவர் ஏ.வி.லினோ பரதவர் மற்றும் காமராஜர் சமூக நீதி பேரவையைச் சேர்ந்த எம்.பாபு ஜீ நாடார் ஆகியோர் இணைந்து படத்தின் திரையைத் திறந்து வைத்து மரியாதை செலுத்தினர்.

 நினைவேந்தல் உரைகள்:

அர்ஜூனா விருது பெற்ற தேசிய கபடி வீரர் பைசன். மணத்தி கணேசன், வீராங்கனை அமைப்பு நிறுவனர் பாத்திமா பாபு, தூத்துக்குடி மாவட்ட வழக்கறிஞர்கள் சங்கத் தலைவர் எஸ்.பி. வாரியார், நீதி அரசர் செந்தூர்பாண்டியன், வழக்கறிஞர் ராமசந்திரன் மற்றும் திராவிடர் கழகம், மீனவர் மக்கள் கட்சி, திராவிட விடுதலை கழகம், விசிக, நீர்வள நிலவள பாதுகாப்பு பேரவை, திராவிட தமிழர் கட்சி, டாக்டர் அம்பேத்கர் பணியாளர் மற்றும் பொறியாளர் சங்கம், அகில இந்திய மாவீரன் சுந்தரலிங்கனார் பேரவை ஆகிய அமைப்புகளின் தலைவர்களும் பிரதிநிதிகளும் நினைவேந்தல் உரையாற்றினர்.

மேலும், தூத்துக்குடி செயின்ட் ஜூட்ஸ் ஆலய பங்குதந்தை அருள் தந்தை வழக்கறிஞர் அருமைநாயகம், பாளையங்கோட்டை திருக் குடும்ப அருட் சகோதரிகள் இந்தியப் பிரதிநிதி வழக்கறிஞர் அருட்சகோதரி ஜோசபின், தமிழ்நாடு இஸ்லாமிய கூட்டமைப்பு நிறுவனர் தலைவர் தூத்துக்குடி S.M. சம்சுதீன், ராயல் எம்பவர்மெண்ட் சேம்பர் ஆப் காமர்ஸ் நிர்வாகி ராஜ் நிர்மல் சிங் மற்றும் கொள்கை ரீதியான நண்பர் வன்னியராஜ் ஆகியோர் சிறப்புரையாற்றி நினைவுகளைப் பகிர்ந்து கொண்டனர்.

சர்தார் ஜீவன் சிங் அவர்களின் சிறப்புரை:

நிகழ்வில் தலைமையுரையாற்றிய பகுஜன் திராவிட கட்சியின் தேசியத் தலைவர் சர்தார் ஜீவன் சிங் அவர்கள் குறிப்பிடுகையில், "அதிசயகுமார் அவர்கள் தன்னுடைய பேனாவை வைத்து சுயமரியாதையையும், தான் வைத்திருந்த வாளினால் சுயபாதுகாப்பையும் கடைசி வரை காத்துக்கொண்டார்" என்றார். சீக்கிய மதத்தில் வாள் வைத்திருப்பது 'கிருபான்' என்று அழைக்கப்படுவதையும், அதற்கு 'கிருபை' என்று பொருள் என்பதையும் அவர் விளக்கினார்.

இந்தியாவில் இன்று ஒரு இனம் சுயமரியாதையுடன் வாழ்கிறது என்றால் அது சீக்கியர்கள் மட்டுமே என்று குறிப்பிட்ட அவர், "நீங்களும் சுயபாதுகாப்புடன் வாழ அடுத்த ஆண்டு நடைபெறும் அதிசயகுமார் நினைவேந்தல் நிகழ்ச்சியில் உங்கள் அனைவருக்கும் சீக்கிய முறைப்படி வாள் நினைவாக வழங்கப்படும்" என்றும் அறிவித்தார். மேலும், பெரியாரினால்தான் 'சுயமரியாதை' என்ற வார்த்தை இன்றுவரை வாழ்ந்துகொண்டிருக்கிறது என்று குறிப்பிட்ட அவர், தாழ்த்தப்பட்டோரின் வாழ்வியல் மேம்பாட்டிற்காக இறுதிவரை போராடிய அதிசயகுமார் விட்டுச்சென்ற பணியை நாம் அனைவரும் ஒருங்கிணைந்து தொடர்வோம் என உறுதிபடத் தெரிவித்தார்.

சிறப்பம்சங்கள் மற்றும் பரிசுகள்:

நிகழ்ச்சியில் அரசியல் செயல்பாட்டாளர்கள், இயக்கவாதிகள், சுற்றுச்சூழல் வாதிகள், மனித உரிமைப் போராளிகள், வழக்கறிஞர்கள், மருத்துவர்கள், சிறுபான்மையின இயக்கத் தலைவர்கள், பொறியாளர்கள் மற்றும் அரசு ஊழியர்கள் என ஏராளமானோர் கலந்துகொண்டனர்.

நிகழ்ச்சியில் பங்கேற்ற அனைவருக்கும் பேனாவும், பெரியார், கன்ஷிராம் மற்றும் சீக்கிய மதக் கோட்பாடுகள் குறித்த புத்தகங்களும் பரிசாக வழங்கப்பட்டன. மேலும், சீக்கிய பாரம்பரியத்தின்படி, விருப்பமுள்ள சிலருக்கு வாள்கள் (துளவாள்/கிர்பான்) வழங்கப்பட்டது குறிப்பிடத்தக்கது.

 நன்றியுரை: முடநீக்கியல் துறை மருத்துவர் Dr. பாபு செல்வக்குமார் M.PT. (வழக்கறிஞர் அதிசயகுமார் அவர்களின் இளைய சகோதரர்) அவர்கள் நன்றியுரை வழங்கினார்.

 தொகுப்புரை: பகுஜன் திராவிட கட்சியின் தேசிய செய்தி தொடர்பாளர் வழக்கறிஞர் செல்வா சிங் நிகழ்வைச் சிறப்பாகத் தொகுத்து வழங்கினார்.