தூத்துக்குடியில் அதிகரிக்கும் போதைப்பொருள் நடமாட்டம்! பொதுமக்கள் அச்சம் போக்க காவல்துறை தீவிர நடவடிக்கை எடுக்க வேண்டும் - சிபிஎம் கோரிக்கை

Oct 23, 2026 - 13:03

0 16

தூத்துக்குடி: மார்க்சிஸ்ட் கம்யூனிஸ்ட் கட்சி, தூத்துக்குடி மாநகரக் குழு.மாநகரச் செயலாளர், எம்.எஸ். முத்து, வெளியிட்டுள்ள செய்திகுறிப்பு : தூத்துக்குடி மாநகரப் பகுதிகளில் சமீபகாலமாக போதைப்பொருட்களின் நடமாட்டம் அதிகரித்து வருவதாக பொதுமக்கள் மத்தியில் கவலை எழுந்துள்ளது. இதனால் பொதுமக்கள், குறிப்பாக இளைஞர்கள் மற்றும் பெற்றோர்கள் மத்தியில் அச்ச உணர்வு ஏற்பட்டுள்ளது.

போதைப்பொருட்கள் இளைஞர்களின் எதிர்காலத்தையும், குடும்பங்களின் நிம்மதியையும், சமூகத்தின் பாதுகாப்பையும் பாதிக்கக்கூடிய மிகப்பெரிய பிரச்சினையாகும். போதைப்பொருள் பழக்கத்தால் இளைஞர்களின் கல்வி, வேலைவாய்ப்பு மற்றும் எதிர்கால வாழ்க்கை பாதிக்கப்படும் அபாயம் உள்ளது.

தூத்துக்குடி மாநகரின் பல்வேறு பகுதிகளில் போதைப்பொருட்கள் விற்பனை மற்றும் நடமாட்டம் தொடர்பாக எழும் புகார்கள் குறித்து காவல்துறையினர் உரிய விசாரணை நடத்த வேண்டும். போதைப்பொருட்கள் எங்கிருந்து கொண்டு வரப்படுகின்றன, யார் விநியோகம் செய்கிறார்கள், இதன் பின்னணியில் செயல்படுபவர்கள் யார் என்பதைக் கண்டறிந்து சட்டப்படி கடுமையான நடவடிக்கை எடுக்க வேண்டும்.

குறிப்பாக பள்ளி, கல்லூரி மாணவர்கள் மற்றும் இளைஞர்கள் போதைப்பொருட்களின் பாதிப்புக்கு உள்ளாகாமல் தடுக்கும் வகையில் விழிப்புணர்வு நடவடிக்கைகளைத் தீவிரப்படுத்த வேண்டும். முக்கிய பகுதிகளில் கண்காணிப்பை அதிகரித்து, இரவு நேர ரோந்துப் பணிகளைத் தீவிரப்படுத்த வேண்டும்.

போதைப்பொருள் விற்பனை மற்றும் கடத்தலில் ஈடுபடுபவர்கள் மீது பாரபட்சமின்றி நடவடிக்கை எடுப்பதோடு, தகவல் அளிக்கும் பொதுமக்களின் பாதுகாப்பையும் உறுதி செய்ய வேண்டும்.

எனவே, தூத்துக்குடி மாநகரில் போதைப்பொருள் நடமாட்டத்தைக் கட்டுப்படுத்தவும், பொதுமக்களின் அச்சத்தைப் போக்கவும், இளைஞர்களின் எதிர்காலத்தைப் பாதுகாக்கவும் மாவட்ட காவல்துறை மற்றும் மாநகராட்சி நிர்வாகம் உரிய நடவடிக்கைகளை மேற்கொள்ள வேண்டும் என்று மார்க்சிஸ்ட் கம்யூனிஸ்ட் கட்சி தூத்துக்குடி மாநகரக் குழு வலியுறுத்திக் கேட்டுக்கொள்கிறது.

---

*Tags:* Thoothukudi Drug Issue, CPM MS Muthu, Thoothukudi Police, Drug Awareness